ថ្នាំទប់ស្កាត់ភាពចាស់ណាសាចង់បាន នឹងពិសោធន៍លើមនុស្សឆាប់ៗនេះ
ក្រុមអ្នកស្រាវជ្រាវនៃសកលវិទ្យាល័យ University of New South Wales បានបង្កើតឡើងថ្នាំដ៏អស្ចារ្យដែលអាចទប់ស្កាត់ភាពចាស់តាមរយៈការជួសជុល DNA ដែលរងការខូចខាត ហើយវាថែមអាចជួយការពារអវកាសយានិកពីវិទ្យុសកម្មនៅលើភពអង្គារបានទៀតផង។
អំឡុងពេលពិសោធន៍លើកណ្ដុរក្រុមស្រាវជ្រាវរកឃើញថាថ្នាំបានទៅព្យាបាល DNA ដែលខូចដោយសារសារធាតុវិទ្យុសកម្ម និង វ័យចាស់ជរាបានដោយផ្ទាល់។ សាស្ត្រាចារ្យ David Sinclair អ្នកដឹកនាំក្រុមបានលើកឡើងថា ៖ «បន្ទាប់ពីទទួលការព្យាបាលបានមួយសប្ដាហ៍ឃើញថាកោសិកានៃកណ្ដុរចាស់មិនខុសគ្នាសូម្បីតែបន្តិចពីកោសិកាកណ្ដុរក្មេង»។
ការពិសោធនៅលើមនុស្សនឹងចាប់ផ្ដើមក្នុងពេល ៦ ខែទៀត។ សាស្ត្រាចារ្យខាងលើបានបន្ថែមថា ៖ «យើងបានចូលកាន់តែកៀកថ្នាំទប់ស្កាត់ភាពចាស់ដែលមានសុវត្ថិភាពរួមទាំងប្រសិទ្ធភាព ដោយប្រហែលត្រឹម ៣ ទៅ ៥ ឆ្នាំទៀតវាអាចបង្ហាញខ្លួនលើទីផ្សារ។ នេះប្រសិនបើការពិសោធប្រព្រឹត្តទៅដោយរលូន និង ជោគជ័យ»។
ការស្រាវជ្រាវនេះក៏បានទាក់ទាញចំណាប់អារម្មណ៍អង្គការណាសាមិនស្ទើរដោយសារអង្គការជួបបញ្ហាក្នុងការថែរក្សាសុខភាពអវកាសយានិកអំឡុងពេលធ្វើបេសកកម្មបួនឆ្នាំទៅកាន់ភពអង្គារ។ សូម្បីតែបេសកកម្មរយៈពេលខ្លីក៏អវកាសយានិកអាចប្រឈមនឹងការកើនឡើងភាពចាស់លឿន ដោយសារតែវិទ្យុសកម្ម។ ពេលត្រឡប់មកវិញគេអាចកើតអាការៈខ្សោយសាច់ដុំ, បាត់បង់ការចងចាំ រួមទាំងអាការៈផ្សេងទៀត៕
0 comments: